I of V
Te mārehe pū o te tuku tahi i te pūtea mō te haonga ika tauhoko
Ko tēnei mea, te Precision Seafood Harvesting (PSH) tētahi hōtaka, e iwa tau te roa, i whakahaeretia i raro i tētahi Whakaurunga Whanaketanga Ahumatua i te taha o te Manatū Ahu Matua, e whai nei ki te whakawhanake, ki te whakamātau i te hangarau hao tīpakopako ki runga waka pūhoro tauhoko.
Te taha ki ngā au mahi i oti i raro i te hōtaka tuatahi, ko Moana New Zealand tētahi o ngā kaihaumi ngātahi tuatahi, me Plant & Food Research hoki, e haumi tonu ana i te hōtaka PSH.
Tērā te hangarau kōwae hiika e whanake haere ana, e kīia nei ko Tiaki.
E whakapono ana mātou ki ngā painga ā-tauhoko o te hangarau nei, me te aha ka rite tonu te putaputa o ngā hua kaimoana o te taumata hou o te kounga, i haoa rā e ora tonu ai te mauri.
Ko te putanga e manakohia ana e mātou, ka whaihua, ka manawaroa te umanga hiika o Aotearoa.
E koa ana te ngākau ki te pūrongo ake kua whakaaetia tā mātou tono pūtea hou, ā, ka haere tonu ngā rangahau, ngā whanaketanga kia pai ake ai te hangarau pūhoro nei.
Kia hāngai ai ki te kaitiakitanga, ko te whakaaro o te PSH he whakaputa kaimoana kounga ake i haoa kia ora ake ai te mauri, ā, ka noho ngā kai nei hei mea nui kē ki ngā kiritaki matatika e whakatau nei i ā rātou hokonga.
Kua taunakitia te pikinga o te morehutanga, te kōwhiringa, me ngā painga o te kounga, e tūmanako nei mātou ka hokona ukaukatia ki tāwāhi.
E kōkiri ana ā Moana New Zealand haumitanga tahitanga i ētahi kokiritanga kaupapa pēnei me te rangahau rārangi ratonga, te whakawana i te ingoa o ō Aotearoa mahinga ika i te ao, te whakarite i ngā hangarau hou hei hoko atu, me te whakatau i ngā momo ika e whāia ana, me te whakahaerenga mahinga ika.
E rikarika ana te ngākau ki te hoatu i ngā kōrero hou ki a koutou.
II of V
Te mārama o ngā raraunga, o te pūrongotanga hoki
Ko te hoa haere o te whanaketanga o ngā hangarau kōwae hiika ko te whakahirahira o ngā raraunga, o te pūrongotanga hoki o te wā nei, hei whakawana i te ingoa o ō Aotearoa mahinga ika i te ao.
E mōhiotia ai he mea hao ā mātou kaimoana kia toitū ai te mauri ora, mai i ō tātou wai horomata, ka whakahaere tō mātou Wāhanga ō-Uta i ngā raraunga haonga mā ngā kaihiika whai kirimana.
Kātahi mātou ka whakahoki i te pūtea ki ō mātou kaihiika e ai ki te roherohenga i tohaina rā e mātou, me te āta whakarite anō i ngā ika hei whai mā tēnā tira kaumoana, mā tēnā tira, me te wā hoki o te tau. He mea kapo, he mea tuari hoki ngā raraunga i te wā e kapohia ai, me te aha ka tino mōhio mātou e haoa ana ngā ika i ngā tōpito katoa o te mahinga ika, ā, e hao ana mātou i ngā ika anake e hiahiatia ana e te mākete.
He pēnei anō te ritenga mō ngā momo katoa o te ika whaitira, te pāua me te kōura.
Kei runga i a tātou te herenga, te haepapa manaakitanga kia mārama te kitea o ā mātou mahi hei kaitiaki.
Ko ēnei kōrero tētahi o ngā maitai hei āwhina i te Manatū Ahu Matua e manaaki nei i ngā rāngai ika. he pākaha hoki te tiakina o ngā raraunga ki tō mātou Wāhanga ō-Uta, ā, he auau tonu te arotakea o Moana New Zealand e MPI.
Roger Rawlinson - Skipper / Owner FV Santy Maria, RMD Marine
Ko tētahi tauira o tēnei hanga ko tō mātou Wāhanga ō-Uta e tautoko ana i te whakawhāititanga o ngā haonga hāpuku, kia hāngai ai ki ngā kōrero e tukuna mai ana e ngā kaihiika whai kirimana, kia ora tonu ai te mauri o ngā rāngai mō ngā whakatupuranga e haere mai nei.
Waihoki, e wātea ana ō mātou kaihiika whai kirimana katoa ki ngā whakangungu kaihiika haepapa hei tuari kōrero mō te pūrongo raraunga haonga, te haumarutanga, te whanonga kaumoana, me te manaaki i te mauri o te moana.
I te tau pūrongo nei, i oti i tō mātou Wāhanga ō-Uta tētahi arotake rautaki o ā mātou hātepe mō te pūrongo raraunga haonga, ā, ko te whāinga matua o te hāpai i te whakatipuranga – arā ko te tōnuitanga ki tua rā mā ngā iwi katoa.
Ko te putanga o te arotake, kua whakaritea tētahi tūranga hou, ko te Kaiwhakamahere Roherohenga, Ratonga hoki.
III of V
Te ārahi i ngā mahi atamai o te tio
E koa ana te ngākau ki te tuku i ngā pitopito kōrero hou ki a koe mō tā Moana haumitanga hei whakawana i ō mātou pāmu tio ki ngā whanga i Te Tai Tokerau, i Te Tara o te Ika hoki.
Ko mātou te mea nui katoa o ngā kaimahi pāmu tio, ngā kaituku rawa o te motu, ā, ko tō mātou haepapa hei kaitiaki he whakaputa, he hao mātaitai e toitū tonu ai te mauri, ā, he pono tā mātou kawe i te haepapa nei.
He whāinga nui tā mātou, arā kia tāruatia te whakaputanga tio mō te tau 2026, ā, e $21 miriona kua haumitia e mātou hei whakawhānui i ngā pāmu me ngā āheinga mahi tio kia tutuki ai taua whāinga.
E hāngai ana te whāinga tupuranga nei ki tā te Kāwanatanga whāinga mō te uara umanga ahumoana, arā e $3 piriona mō te tau 2030.
$21m
invested in oyster farming and operations capability.
He putanga pai o tā mātou hinonga whakaihiihi tio whānui tonu ko ngā āheinga whakapānga ki te ao mātauranga, ki ngā hapori hoki. He pērā anō te whakamahinga o ngā kairato o te rohe hei hanga i tō mātou paonga tōhua i hangaia mō taua take anō.
Kei tō mātou toa kaimoana i runga ipurangi, kei ōu toa hokomaha ā-rohe hoki ā mātou tio.
Visit our online storeKo mātou te mea nui katoa o ō Aotearoa kaiwhakaputa tio, kaituku tio hoki, ā, e mārama ana ko tō mātou oranga tonutanga ko ngā mahi atamai o te ahumoana.
Kua roa mātou e whakatupu tio ana ki rō kete. Nā te hangarau hou nei i āhei ai te whakaaunoatanga o ētahi āhuatanga o te whakatupuranga, o te raweketanga hei whakapai atu i ngā ritenga tupuranga. Ko te rerekētanga matua ko te huringa o ngā kete i runga taura, me te paehuri kia āhei ai te whakaaunoatanga. E māunu ana hoki, kāore i te mau ki tētahi aronga kotahi.
E eke ai tēnei, kua tīmata ō mātou tira ki Pārengarenga, Whangaroa me te Tara o te Ika i te hātepe ki te whakarite i ngā whaitua waiwai kia here ai ngā kete ki te taura e noho nei ki te mata o te wai i waenga pou. Tērā ko te unu i ngā pou rākau tawhito, ko tōna 99.7 ōrau o ngā hanganga o te wā nei i rō wai.
Ka whakatupu mātou i te nuinga o ā mātou tio pirianga e hoko nei mātou ki tō mātou ake pāmu ki Whakatū, ā, ākuanei whakaputa ai mātou i ā mātou ake tio pirianga ki te paonga i hangaia i mua tata nei. Kātahi ka haria atu ki ō mātou pāmu ki rō whanga ka whakatupuria ai.
He 18 marama te roa o te hātepe, ā, ka haria ā mātou tio ki Wiri, ki te Tara o te Ika rānei kia māhititia ai hei hoko ki ngā kiritaki tarāwhare, ngā kiritaki o tāwāhi hoki.
Ka taea te hoko tio ora, tio mātao, tio pātio rānei. Ina tata nei mātou i tīmata ai ki te tukutuku ki ngā toa hokomahi i ngā pūhera tio anga tahi, e ono tio ki te pūhera, tekau mā rua rānei.
He hinonga whakahihiko tēnei e ahu atu ana ki tua o te pae, ko tōna pūtake ko ō mātou tikanga nui, ko te kaitiakitanga me te whakatipuranga.
IV of V
Tirohanga pāwawe ki te whakatuwheratanga o te paonga
Ko te tikanga ia ka tuwhera tō Moana New Zealand Paonga ki Whakatū i te tōmuritanga o te tau 2021, ka aroha hoki nā te Kōwheori19 i takamuri ai. Kia tīmata rā anō te mahi, ka rite tonu te homai o te tio pirianga mō ā mātou tio kounga i te roanga o te tau.
Ka tōia mai ngā tāngata pūmanawa nui e tō mātou whare ahumoana whakaihuwaka ki tō mātou umanga, he take nui tērā i te ao, i te pō.
E $4.9 miriona kua haumitia e mātou, ā, e whakahīhī ana mātou i te hokonga mai o ā mātou rākau i taua rohe anō, mai i Nelson Pine, nāna i homai ngā pou toko tū tonu. E mihi ana ki te pakihi kāmura, ki a IMB, nāna nei te whare i hanga.
$4.9m
invested into the Nelson Hatchery
I pāngia kinotia tā mātou wātaka e te Kōwheori19, inā hoki e ngā nōhanga rāhui me te taenga mai o ngā rauemi. E rorotu ana te ngākau ka tīmata ngā whakamātautau whakaputa hua hei te Huitanguru 2022, ā, hei te marama o tua atu puta ai ngā hua tuatahi hei hoko atu.
Tēnā whāia te tāroinga ataata o te whare o Moana New Zealand ki Whakatū.
Olin Pilcher – Nelson Operations Manager, Moana New Zealand
One of the briefs of the build was to build in some sustainability aspects to it. We’ve used LED lighting throughout. We’ve also invested in a pretty substantial solar system on the roof.
Growing Pacific oysters the larvae like to grow in really warm water. We’ve designed the building to capture heat.
There’s a lot of space here that we won’t be using initially but it allows us to grow into it and really up that production so that’s really exciting.
The framework of the building is based on an LVL structure and looks a bit like plywood but done with really thin strips of veneer glued together and it creates a really strong wooden structure. Also it’s produced locally, Nelson Pine. It’s a renewable resource.
One of the beauties of what we’ve done with this building is we could have built exactly what we need right now. The areas been designed to double the capacity that we have. The way Moana thinks and operates, is to look really long-term.
V of V
He rite tō te mātaitai o Aotearoa puhanga hauhā ki tō te tofu
I whai wāhi a Moana New Zealand ki tētahi rangahau nō mua tata nei i whakaputaina ai e ngā mātanga toitū-oranga, e Thinkstep-ANZ. Ka kitea ko tētahi o ngā puhanga hauhā iti rawa mō ngā pūmua kararehe katoa ko tā ngā mātaitai i whakatupuria ki Aotearoa nei, he rite anō ki tā te pūmua rākau nei, te tofu.
Ko te Life Cycle Assessment (LCA), nā te Manatū Ahu Matua me Aquaculture New Zealand te pūtea tautoko, tētahi tātaritanga mātotoru o te roanga o te oranga o te kuku (Perna canaliculus), o te tio (Crassostrea gigas) hoki i whakatupuria i Aotearoa.
Whiriwhiria ai e LCA te oranga katoa o te mātaitai pāmu mai i te moana ki te kono ki tua noa atu. Arā ko te kohi pirianga (mātaitai pūhou), tae atu ki te wā whakatupu ki runga pāmu, te haonga, te mahinga, te pūheratanga, te tukunga, te takanga kai, me te karawhiunga o ngā anga me ngā pūhera.
Ka kitea e te rangahau nei he rite te pānga o te mātaitai i whakatupuria (mai i te pāmu ki te wā o te hokonga tarāwharetanga) ki tā te tofu, ā, he rite rānei, he iti iho rānei tāna puhanga hauhā ki ētahi atu momo pūmua kararehe katoa i rangahaua, tae atu ki te mīti kau, te manu, ngā kai miraka me ngā hēki e mahia mai ana i tāwāhi.
Ka ahuahua ngā rauemi pēnei me te penehīni, te waka me te pūngao o te mahinga hua hei tātai i te katoa o te pānga kino ki te taiao.
E ai ki te Kaiwhakahaere Matua o Aquaculture, ki a Fiona Wikaira, “e kaikā ana a Moana kia whai wāhi ki te Arotake Oranga o ā mātou tio whakatupu. He kamupene kaimoana mātou, nō te Māori tōna katoa, ā, ko te kaitiakitanga tētahi o ā mātou tikanga. Koirā mātou i titikaha ai ki te whakamārama i te puhanga hauhā, me te whakatakoto anō i tētahi mahere whakawhāiti i ā mātou pānga kino, ā, me te hora hoki i te kaimoana kounga e wawatatia ana e ō mātou kiritaki.”
Ka tautokona te ahumahi ahumoana e te Rautaki Ahumoana a te Kāwanatanga, kia mahia mai kia $3 piriona mō te tau 2035, ā, ka arohia hoki te pitomata o te ahumoana kia noho mai hei wāhanga nui o te ōhanga puhanga iti, te ōhanga o āpōpō.