06 - Tō Mātou Wāhi

Demand Flex

E tautoko tonu ana mātou i te kaupapa whakakore-waro a Aotearoa kia pai atu ai te whakamahinga o te pūngao toitū, me te tahuritanga atu i ngā koranehe.

I te tau 2019, i piri atu tō mātou wāhi mahi i te Papaioea ki Demand Flex, ā, i te tau nei e eke ana tō mātou wāhi mahi i Maungarei ki runga i te waka.

Ko tā Demand Flex he whakahoki i te hiko ki te pūnaha hiko i ngā wā o te kainga nuitanga o te hiko, me te aha ka kore e mate ki te tahuri ki ngā puna pūngao whatungarongaro kia ngata ai te hiahia o te mākete ki te hiko.

I ngā wā e hiahiatia ana, ka aunoa te whakawetonga o ētahi maitai i tautuhia, ka whāiti iho te kaikai hiko. Kātahi te pūngao ka parea, ka ‘whakahokia ki te pūnaha’ rānei.

“He ngāwari, he kautere hoki te haere a te pūnaha mai anō i tōna whakatūranga. Ka hihiko te ngākau i te mōhiotanga a ō mātou tāngata e whakahoki hiko ana mātou ki te pūnaha i ngā wā e hiahiatia ana,” hei tā te Kaiwhakahaere Wāhi Mahi ki te Papaioea, hei tā Mohammed Khan.

Mātakina te whitiata ki YouTube

Ka rewa ake te matatopa Māui

I te Pēpuere o te tau nei, ka whakarewaina ōkawatia te hinonga matatopa Māui e te Pirīmia, e Jacinda Ardern, rāua ko te Minita mō te Moana me te Tini a Tangaroa, e David Parker.

He mahinga tahi te Hinonga Matatopa Māui nei i waenga i a MAUI63, te Manatū Ahu Matua (MPI), me WWF-New Zealand, ā, e tautokona ana e Moana me Sanford.

Kua whakapiritia e MAUI63, he rōpū kaua-mō-te-pūtea, i te matatopa nui me te punenga rorohiko (AI) hei kimi, hei whai i te popoto. Ka āwhina te Hinonga Matatopa Māui ki te whakakī i ngā kete kōrero pūtaiao mō te noho a te ika nei ki hea, ki hea, me te āhua o tāna whakamahi i tōna nōhanga.

Ka āwhina aua raraunga i ngā kaihanga kaupapa here, ngā kaipūtaiao, te umanga hiika, te iwi whānui, me ētahi atu hoki ki te whakatūturu ka whaihua te tiakitanga tonutanga o te momo ika nei e tino mōrearea ana.

E ai ki a Minita Parker mā te matatopa e whai wāhi nui ai tātou, mō te wā tuatahi, ki ngā kōrero whakahirahira mō te popoto, me te iti noa ake o te utu i ō ētahi atu huarahi kohikohi raraunga.

Ka tautohua e te AI ngā popoto takitahi mā ngā tohu urutira, ā, ka āhei ki te whakawehewehe i ngā kātua me ngā kūao.

Hei tā te Tumuaki o Moana, hei tā Steve Tarrant, he mea nui kia hāngai te tautokonga o te atamaitanga ki ngā mātāpono a te kamupene.

Me whai ngā matatopa katoa, ngā mea taumaha ake i te 25 kg, i te hātepe whakaaetanga māori, te hātepe motuhake hoki, kia whakaaetia ai kia rere, mehemea ka haumaru te whakamahinga ōna. Te whiwhinga o te whakaaetanga a Te Mana Rererangi Tūmatanui o Aotearoa, kua rewa ake te matatopa, ā, e akoako haere ana ngā kaihautū ki te rere.

E rikarika ana te ngākau ki te whāriki i ētahi atu pitopito kōrero hei ākuanei.