Tō tātou tau
our year
I
of
XV
Tā te Tiamana pūrongo
Tēnā koutou katoa
He wā whakahirahira te tau 2024 i roto i tā mātou pakihi, e arongia ai ngā tau e 20 e tū nei tātou, me te whakamiha anō i tō mātou whakapapa mā te arongia o ngā tikanga mahiika Māori mā roto i te Tiriti o Waitangi.
Tēnei mātou te mihi nei ki a rātou i whai wāhi ki te whawhai nui i te whiriwhiringa o ngā Whakataunga, inā hoki ki te tokorua i noho ki te kauhanga o te riri, ki a Tā Tipene O’Regan rāua ko Whaimutu Dewes, nāna i noho hei Tiamana o Moana mō ngā wāhanga e toru. Nō rātou ngā taonga tuku iho hei kawe, hei manaaki mā tātou.
Tērā ētahi nekenekehanga i roto o Moana i te tau kua hipa. E rere atu ana aku mihi ki te tumu o Moana e wehe nei, kia Rangimārie Hunia, me tōna kaha ki te arataki i ngā mahi hiika Māori. Nau mai e Dean Moana kōrua o Bella Takiari-Brame ki te Ohu o Moana. He whakapapa ō Bella ki roto o Waikato-Maniapoto iwi, ā, he Mema Whaimana ia o te Institute of Directors, he Kaitātari Whaimana Matua o Chartered Accountants Australia and New Zealand. Kua roa a Dean e mahi ana i te rāngai kaimoana, ā, kua roa e noho ana hei tumu ki te Iwi Collective Partnership, Akaroa Salmon, and Ngāti Porou Seafoods.
E koa ana te ngākau ki te pōhiri mai i ngā hoa tumu hou, i a Emma Winiata rāua o Cornell Tukiri. E rikarika ana ki te rongo i ō kōrua whakaaro hou, mahi hoki i a tātou e tūariari kōrero ana i te taha ārahitanga, taha whakahaerenga hoki.
Kei runga i tēnā me tēnā o tātou te haepapa nui ki te tiaki i ngā taonga i waiho mai ki a tātou mā roto i te Whakataunga Mahiika mā ngā iki katoa. E whakahīhī ana ahau i ā mātou ekenga, ā, e mihi ana ki ō mātou kaimahi katoa te oke tonu nei i ngā wā taumaha nei. Ahakoa ngā haupāuma o ngā tau e rua kua hipa, kua whakatuwhera i tō mātou Kaimoana Hub, kua haumi mātou ki a Sealord kia taea e rātou te whai IFL, ā, nā roto i tā mātou kirimana me Sanford kua tū mātou hei kamupene kaimoana ā-tai nui rawa o te motu. Ka kaha tonu mātou ki te koke i te huarahi i parangia e te hunga o mua i a mātou, ā, e koa ana te ngākau ki te taki i ētahi whakaaro ki tā mātou rautaki o te wā anei, me ngā ekenga i roto i ngā tau ruarua kua hipa nei.
I tēnei tau, i whakapuaki Te Ohu Tumu he moni hua $6.58 miriona mō te tau pūtea 2023/2024. Ko ngā taipitopito anō mō tēnei hua kei roto i te pūrongo a te Tumuaki me ngā tino whāiti pūtea.
Ko au te Tiamana o te Ohu o Moana, ā, he rite tonu te whakahūmārietia ōku e te ngākau titikaha o ngā tāngata o te pakihi nei, ā, ka nui te hari ki te noho i te tau nei, hoki mahara ai ki ngā rā kua hipa, me te whakaū anō i a mātou ki te mahi e mahi nei mātou kia tere tonu ai te waka e hoe tātou ki tua o te pae.
Ngā mihi nui.
Rachel Taulelei
Director, Chair of the Board
II
of
XV
Tā te Tumuaki Pūrongo
Ko te kaupapa nui o ā mātou mahi i ngā tau nui kua hipa ko te manawaroa, ā, he pērā anō te tau 2024. He $12.4 miriona ngā moni utunga i mua i te tāke me te huamoni, he pikinga mā te $1.5 miriona, 13% rānei, i te huanga o te tau 2023.
I roto i tā mātou pūrongo weherua tau, i huaina e mātou ko te utu o te uru ki te rīhi roroa o tā Sanford roherohenga Ika-o-uta ki Te Ika-tapu-a-Māui, ko te tohutohu a te International Financial Reporting Standards (IFRS) me whakamana tētahi rawa tikanga whakamahinga (TW) whakahirahira, me tētahi nama rīhi e hāngai ana. Ko te pānga o taua tikanga tātaritanga he kino ki ā mātou moni utunga i pūrongotia i muri i te tāke mō ngā tau tuatahi e whā, ā, manohi anō, he pai te pānga ki ngā tau whakamutunga e whā. I muri mai i te whakaarohanga o ētahi kupu tohutohu nāna nei i tautuhi ētahi mahi kē atu e whakamahi ana i tētahi kapenga rīhi popoto, e whakatāmate ana mātou i te utu uka a-tau o te rīhi Sanford pērā anō i ētahi atu rīhi haonga ā-tau e whakaaetia ana (HATW). Ka piki ngā moni utunga 2024 i ngā painga mahi tātari i whakahoutia rā mā te $2.6 miriona.
Ika
Hui katoa, i heke ngā haonga Ika mā te 12% i te Mahere, engari i piki mā te 58% tēnā i te haonga 2023. Ahakoa i aukatia te whāwhātanga o te HATW Sanford mō te kotahi marama, ko te mate nui kē ko te takamuri o te whaiwāhi ki ētahi waka pūhoro hou e rua, kāore i rite taea noatia te Pepuere 2024. Nā te takaroanga nei i rerekē ai ngā mahere haonga, me te aronga hoki mō te nuinga atu o te tāruru waka, me te aha he 12% te hekenga i te haonga i maheretia, ā, i pērā anō te nui o te hekenga o ngā hokonga atu. Ko tētahi kōrero pai ko ngā utu mahi, he iti iho i te Mahere mā tōna 8% nā runga i te iti kē o ngā haonga i mahia, me te iti kē i tā mātou i whakaaro ai o ngā utu ngaringari e hua ake ana i te haonga o te HATW Sanford.
Pāua Tūwā me te Kai Ora
I heke ā mātou moni utunga i te Pāua Tūwā me te Kai Ora mā te 33% i te Mahere, me te 20% i ngā moni utunga 2023. Ahakoa he nui atu te wāhanga ki te Kai Ora i te Mahere nā runga i te huhua o ngā momo hua, ko te take nui o te hekenga nei e ai ki te Mahere me te tau kua hipa ko te pāua tūwā pōwhā, he kaha te noho mai o tērā hei pū o te pakihi.
E pēhia haeretia ana te hiahoko me ngā utu i te roanga o te tau ki ō mātou mākete nui, arā ki Hingapoa, Mareihia me Hong Kong nā te taumaha o te utu oranga, tae atu ki te pēhinga o te utu me te hiahoko i ahu mai i paitia haeretia o te pāua tūwā pōwhā Hainamana e te kiritaki. Ahakoa kua whakawhānui mātou i ngā pāua tūwā ora mā te 21% i te taha o tō te tau 2023 kia māmā ake ai te pānga kino a te hiahoko pōwhā iti, ka pēhia ngā utu i te tōmuritanga o te tau nā ngā hua o Ahitereiria.
Tio
Ahakoa te nama a te Tio, he $1.3 miriona te nui, he nui atu tēnei i te Mahere mā te $2.5 miriona, ā, he pai ake i te otinga o te 2023 mā te $1.9 miriona. Pērā i tā mātou i pūrongo ai i tērā tau, nā ngā huarere kikino i te haurua tuatahi o te tau 2023 i matemate ai tōna 50% o ngā hua, ā, ka haere tonu ki roto ki te tau 2025 nā runga i te tupuranga o ngā hua o runga pāmu, arā he 18-24 marama te roa. Ka rite ki te Mahere te tapeke haonga ahakoa te hekenga o te taurite utu mā te 3% nā te rahinga. Ka ahu nui te nama iti iho i te Mahere mai i ngā uru mahi e tino iti ake ana i tā te Mahere i tohu ai ā, i piki hoki te hoatutanga o tio tūwā.
Pāua Kahurangi
E eke te Mahere i ngā moni utunga a te Pāua Kahurangi, tā mātou pāmu pāua kei Ruakākā, ahakoa he iti iho i ngā moni utunga 2023. Pērā i te Pāua Tūwā, ka pēhia te hiahoko me ngā utu ki Haina i te haurua mutunga o te tau, ā, ka whakamāmātia te pānga kino e ngā utu mahi iti.
Kōura
He nui atu i te Mahere ngā moni utunga kōura mā te hoanga ki Port Nicholson Fisheries (PNF) mā te 10%, ā, he nui paku atu i ngā moni utunga 2023. Nuku atu i te 95% o te haonga ka hokona oratia ai ki Haina, ā, ka noho ki te tūranga tuatahi i te taha o ngā kōura nō wāhi kē i te ao, ka ahu tika mai ngā moni utunga o te ika nei i ngā mahi hokohoko o ngā kaihoko whairawa o Haina. Ahakoa te kaha o te hiahoko me ngā utu i te haurua tuatahi o te tau 2024, ka ngoikore haere i te haurua tuarua i runga i ngā āhuatanga ōhanga kino ki Haina i heke ai te hiahoko - me te aha ka puritia e PNF te haonga mō te haurua tuatahi o te tau hao kōura hou, i tīmata rā i te 1 o Aperira 2024.
Sealord
Kei raro iho nei te whānuitanga o ngā kōrero, ko tō mātou wāhanga o ngā moni utunga a Sealord, he 50%, he huanga o te $26.8 miriona, he nui noa atu tēnei i te nama o te tau 2023, e $2.0 miriona. Kia arongia hoki kei roto i ngā utunga 2024 ko tō mātou wāhanga o tētahi haonga utu wā kotahi, ehara i te uka, he $14.8 miriona te nui. Ka parea tērā ki rahaki, ko tō mātou o ā Sealord utunga, hāunga ngā utu wā kotahi, me ngā utunga nō muri mai i te 1 o Pepuere whai muri i te hokonga o IFL, he pikinga nui tēnei mai anō i tērā tau.
Moni whakaranea
Ko te tapeke utu huamoni pēke mō te tau, 3 $6.3 miriona, he nui atu i te Mahere mā te $1.5 miriona, ā, e $2.3 miriona nui atu i tā te tau 2023. Kāore i roto i te Mahere 2024 i whakkaaetia rā he wāhanga ki tā Sealord pūtea mō te hoko i te Independent Fisheries Limited (IFL). I te hiku o Hanuere 2024, i kuhuna e mātou he $20 miriona ki roto o Sealord mō taua take rā–ko te utu huamoni, kīhai i maheretia, e pā ana ki taua kuhunga ko te $1.1 miriona.
Tēnei te mihi ki ngā kiritaki me ngā kaipupurihea piripono o Moana, nā rātou te kaha tautoko i te pakihi kia eke ki te pae tawhiti. Ko tētahi atu pou o te angitu o Moana ko ngā kaimahi, ngā kaihiika kirimana, ngā kaimahi pāmu, me ngā kairuku moana. Mēnā kāore rātou, me tō rātou ngākau manawa nui, kāore a Moana e tutuki i tō mātou angitutanga. Ko rātou te ngākau me te wairua o tō mātou pakihi.
Steve Tarrant
Chief Executive Officer
III
of
XV
Our financial highlights
Moana FOB Revenue $m
Product FOB Revenue has been relatively stable for the last four years with a significant jump in FY24 due to the additional Ika ACE now leased from Sanford.
Moana EBITDA $m
While Moana EBITDA showed a significant increase from FY20 to FY21 due to impact of COVID on kōura earnings, the increase in the FY24 headline number is due to additional Ika ACE now leased from Sanford and recovery from the weather-related events that impacted Tio earnings in FY23.
Moana EBIT $m
Factors similar to EBITDA have affected EBIT headline earnings although the depreciation cost has increased from $4.3 million in FY20 to $5.6 million in FY24 due mainly to capital expenditure for the Tio Transformation Project.
Moana NPAT $m
The improvement in EBIT has been eroded by a significant increase in finance expenses due to a combination of increasing interest rates and higher levels of debt, including a $20 million equity injection in January 2024 to assist Sealord fund the acquisition of IFL.
Sealord Adjusted NPAT $m
Our 50% share of Sealord earnings had a significant decrease in FY22 and FY23 with a bounce back in FY24 (the FY24 earnings above exclude the impact of non-cash net one-off items, but includes the net benefit of operating earnings arising from the acquisition of IFL).
Dividend Declared $m
The net earnings from Moana’s own business activities and 50% share of Sealord’s earnings (adjusted for the non-cash net one-off items in FY24) is paid out to shareholders at the statutory rate of 40% (fully imputed).
For specie-specific highlights, go to our downloadable 2024 Annual Integrated Report.
IV
of
XV
Te tangata, te ahurea
I te tau nei, ka oti i a Moana tāna tatauranga ūnga kaimahi tuarima o te kāhui katoa. Ine ai mātou i te ūnga o ō mātou tāngata mā ngā tatauranga matatapu auau kia whiwhi ai ki tētahi arotake whaitake o ngā whakhihikotanga o ngā kaimahi, te hiahia ki te noho mai ki Moana, te āheinga ki te mahi i ngā mahi papai i ia rā, me te whakaaro ki te tūtohu i a Moana hei kaitukumahi.
Tukutukuna ai ngā kohinga kōrero ki ngā kaiārahi me ngā kaimahi, ka hangaia tahitia ā-tīma ai ngā mahere mahi kia pai ake ai ngā mahi me te ahurea. Mai anō i te tatauranga 2022, he nui ngā whakapaitanga i hua mai, pēnei me te takinga o tētahi hōtaka Whanaketanga Kaiārahi Matua, ētahi painga kaimahi papai pēnei me te hararei rā whānau e utua tonutia ai te kaimahi me te inihua oranga, me te poutarāwaho akoranga hou, Learn@Moana.
He 65% te piro ūnga kaimahi mō te TP24, he nui atu i te taurite ANZ mō ngā kamupene, ā, he pikinga mā te 15% o tā mātou pire i te tau 2022. I kite mātou i te panonitanga pai o te māramatanga o ō mātou tāngata, me te hononga ki te whakapapa me ngā uara.
63%
participation rate in the 2024 employee engagement survey
65%
employee engagement score
15%
increase in our score from 2022
E tautoko ana te tira Tangata & Ahurea i ngā kaiārahi matua me ngā kaiwhakahaere mā te tuku rauemi, paenga, kuputohu hoki hei āwhina i a rātou ki te kopou kaitono whai pūkenga, me te kanorautanga ki te mātua o ngā whakaaro. I te tau nei, i noho mai hei kaupapa matua ko ngā tūranga ki te hāputa hei tautoko i ngā mahi, inā hoki ko te whakatūranga o tētahi tira mahi pō ki te whare mahi ki Maungarei, Tāmaki Makaurau. Mā te ahunga whai tikanga ki te whakahaere utu kopounga kaimahi, arotakea ai ia tūranga i whakawāteatia e te mutunga kaimahi, te tāokinga rānei, ā, kāore i rīwhitia mā he tino whakahirahira.
Ka tukuna tonutia tētahi hōtaka ki ngā rangatahi whai pūmanawa e te hōtaka rangatira, te Global Fisheries Scholarship i whakatūria rā i te tau 2004 i te taha o Nissui Corporation. He tohu o tā mātou oati ngātahi ki te whakawhanake tāngata, me te whakatupu i te āheinga o ngā rangatira o āpōpō. I te tau nei, tokorua ngā kaiwhiwhi pai i tohua e mātou, ko Adair Houia-Ashwell rāua ko Daria Bell, ka whiwhi ki te karahipi, tētahi kei te tau 2025, tētahi kei te tau 2026. E rua e rua ngā kaiwhiwhi e titikaha ana ki te whakawhanake i ō rāua huarahi mahi i roto i te umanga mahiika o Aotearoa. Kei a rāua hoki ngā pūkenga, ngā pūmanawa kia tū ai hei kaiārahi pakihi Māori o āpōpō.
I te tau nei, tokorua ngā kaiwhiwhi pai i tohua e mātou, ko Adair Houia-Ashwell rāua ko Daria Bell, ka whiwhi ki te karahipi, tētahi kei te tau 2025, tētahi kei te tau 2026.
Ka tahuri a Moana ki ngā āheinga me ngā wero o muri nei, e arotahi ana ki te whakahou anō i ngā taumata mō ngā kaiārahi, me te hanga wāhi e pūāwai ai te tangata.
I te tau nei i whakarewa ai mātou i te Tatauranga Ārahitanga tuatahi hei para i te huarahi mō te Hui Kaiārahi i tū i te Noema. He 100% te hunga o te rōpū tuatahi i puta, me te aha he mārama te tirohanga ki te whakaponotia o ngā kaiārahi, te āheinga ki te homai me te whiwhi whakahokinga kōrero, te mārama ki ngā haepapa kaiwhakahaere, me ngā take whakawhanake tangata. Ko ngā whakaaro me ngā kōrero o te tatauranga he tino whakahirahira mō te hoanga o te hui e rua rā te roa, ā, kua noho hei tirohanga whāiti mō te arotake i kaha o te ū, me te angitu o ngā hōtaka i takina i tērā tau.
He rōpū mātou nō te iwi Māori, e titikaha ana ki te mana ōrite, me te whakaū anō ka āwhinatia te katoa e ā mātou akoranga. He mea hoahoa ā mātou kaupapa ako kia whanake ai te katoa o te tangata, kia āhei ai rātou ki te arotahi ki te whanaketanga whaiaro, te āhua o te mahi tahi ki ētahi, me ngā wā whakaihiihi mō ngā tāngata e whai wāhi ana ki ngā wānanga me te wāhi mahi.
Ngā kaupapa ako hou
I te tau nei, e toru ngā kaupapa ako hou i takina ki te Poutarāwaho Whakangungu Kaimahi o te Kāhui, ā, 10 katoa ngā akoranga taketake e wātea ana hei tautoko i te kokenga me te whakahohoronga o te akoranga a ngā kaimahi i ngā pūkenga me ngā mātauranga. Ko te mahere mō te tau 2025 he whiriwhiri i te āhua o te mahi ki ngā whakauru, tae atu ki ngā mea hou, hei whakapakari i tō mātou hapori whakangungu, hei whakapakari hoki i ā mātou whakangungutanga.
I te tau 2023, i takina e mātou he akoranga kaimahi me mahi rawa, i tohua ai ngā kaimahi katoa ki te mahi i tētahi kaupapa Workplace Respect hei wāhanga o te kōkuhunga ki Moana. Ka tautoko aua akoranga taketake i te tupuranga o tētahi wāhi mahi ora, e arotahi ana ki te oranga hinengaro me te whanaungatanga o ō mātou tāngata, me te pounga o ngā tikanga mahi ngātahi, he mea ārahi nā ā mātou uara.
Ko te kaupapa te kaiārahi i ā mātou mahi hei whakapai, hei mahi hoki i ngā mahi kanorau, mahi kauawhi, tae atu ki ngā whāinga. E titikaha ana mātou ki te hanga i tētahi pakihi mō ngā whakatupuranga o muri nei, me te whakaū hoki he mārama ake ki ō mātou tāngata katoa ko wai mātou. Hei reira pai ai tā mātou hanga wheakoranga, tā mātou whakaea hoki i ngā hiahia kanorau o ō mātou tāngata, me te noho pūmau tonu ki tō mātou whakapapa. E arotahi tonu ana ki te whakawhānui i te whakakanohitanga o te hunga wahine, o te iwi Māori hoki ki ngā taumata waenga, taumata tiketike hoki o te ārahitanga.
V
of
XV
Oranga & haumarutanga
I te Akuhata 2024 i eke mātou ki tētahi pae hou o te pūrongo oranga me te haumarutanga, arā ko te 10,000 o ngā tukunga ki roto ki te pūnaha hauora me te haumarutanga – arā te Tackle Box.
Nuku atu i te 75% o aua tukunga he tohu matua pēnei me te haonga pai, te tūraru, me ngā kitenga a tō mātou tira. E hia mano kitenga ērā e rapua ai, e kitea ai, e pūrongotia ai e ā mātou kaimahi i ia tau. Ko ngā mea pai nei te āhua, ka whakapaitia, ka whakawhānuitia ki te motu katoa hei haumarutanga mō tātou katoa.
E arotahi tonu ana mātou ki ngā āhuatanga e whara nui ai, e mate ai rānei te tangata (WNM). Ka āwhina aua kōrero o roto o ngā kitenga i a mātou kia huri ai hei rōpū ako. Ka ako mātou, ka āta turuki i te huarahi o te whakapaitanga tonutanga.
550+
critical risk observations recorded by staff
I roto i te tau kua hipa, nā ā mātou akoranga i pai tonu atu ai ngā wāhanga o te tūraru nui ki te tūtakitanga o te tangata/mihini me te tautiakanga, ā, nā ngā kitenga tūraru nui e 550+ ētahi o aua āheinga whakapaitanga.
I te mutunga o te TP24, hei te tau o muri arotahi tonu ai te pakihi ki te aukatinga, me te whakaū anō i te ahurea hei aratahi, ako, whakawhāiti hoki i ngā tūraru nui kia haumaru ai ngā kaimahi ki Moana New Zealand.
VI
of
XV
Ika
He tau whakawhiti tēnei mō te Ika, i a mātou e urutau ana ki ngā nui o ngā rōrahi puta noa i tō mātou rārangi tuku mai i te kirimana rīhi roa me Sanford mō tā rātou ACE takutai.
$102m
free on board sales revenue
Hui katoa, ko ā mātou haonga te 88% o te Mahere, koirā tētahi o ngā take i iti iho ai ngā haonga i hokona, te whakaaturia nei ki tā mātou UMMT mō te tau katoa, arā e $7.1 miriona.
He $102 miriona te moni whiwhi hokonga hua (NZD utu hokonga, unuhia te utu kawenga) mai i te 11,274mt rite ki te taumahatanga mata, arā e 90% o te Mahere. I taua wāhanga o tērā tau, he $68 miriona kē mai i te 7,450mt rite ki te taumahatanga mata. Ka kitea i konei te pikinga o ngā haonga e mahia ana.
E pāngia kinotia ana te hiahoko mō te nuinga o te tau, ko te take nui ko te taumahatanga utu oranga i Aotearoa. Ahakoa rā, e kitea ana te manawaroa o ngā hōngere o tō mātou mākete tarāwhare i hua ai te 67% o ngā hokonga taumahatanga mata. Ahakoa e taumaha tonu ana ngā hōngere ki tāwāhi, i mahi tahi tō mātou tira hokonga ki ngā kiritaki o nāianei, i tautuhi hoki i ētahi mea hou kia tupu ai te hiahoko ā muri nei.
He pai nui i eketia, he kaupapa tino nui hoki te whanaketanga o te Kaimoana Hub hou ki Porirua i Te Whanga-nui-a-Tara, i oti i te Hepetema o te tau nei. Ka whakakaoa ki te wāhi rā ā mātou mahinga Ika, mahinga Pāua Tūwā ki Pōneke, tae atu ki te Kōrua i te taha o tō mātou whakauru, Port Nicholson Fisheries.
I oti i te tira Ika te whakawhiti i āna mahi ki te whare hou i te Oketopa 2024, i te taha o ngā mahi whakahaere o te Pāua Tūwā me te Kōura. Kei te whare ki Rongotai ā mātou mahi kaukau, mahi pūhera hoki mō tāwāhi ā oti noa te rēhita rārangi ki Haina, te whakaarohia nei ka oti i mua i te tau maramataka nei. Mā te whakakaonga o aua mahi pakihi e nui mai ai ngā āheinga ki te whakapaipai noa atu i ngā mahi puta noa i ngā pakihi hei ngā tau e tū mai nei.
Mā te whakakaonga o aua mahi pakihi e nui mai ai ngā āheinga ki te whakapaipai noa atu i ngā mahi puta noa i ngā pakihi hei ngā tau e tū mai nei.
I roto i ngā marama 12 kua hipa, he nui ngā akoranga a te tira hei painga mō mātou a muri nei, heoi anō e mau tonu ana te aronga ki te whakatutukitanga o ngā matapaetanga haonga, te whakapaitanga tonutanga o ngā mahi whakaputa hua me ngā mahi puta noa i te rārangi mahi, me te māramatanga pai kē ki ngā hiahia o te kiritaki me te mākete hei tautoko ki te whakatutuki i tā mātou Mahere 2025.
VII
of
XV
Kai Ora
I eke te moni puta ō taua kia tua o te Mahere mā te 8%.
Kei runga i te Mahere ngā hokonga ki te Ope Kātua o Ahitereiria, kei raro ko te wāhanga ki te Ope Kātua o Aotearoa i te Mahere mā te 11%.
I te mutunga iho i eke i a Moana New Zealand ngā rārangi mō ngā Kai Ora mātao ki Woolworths New Zealand, me te aha i raro ngā moni puta tauhoko i te Mahere mō te tau mā te 40%.
E kaha tonu ana tā mātou whai i ētahi atu āheinga mō ngā kai whakahoromata, tae atu ki te atawhai tangata me te tautoko a Awqaf NZ, me ngā āheinga o te kiri-tohu ki ngā kaipupuri tohu o Ahitereiria me Amerika.
VIII
of
XV
Pāua Tūwā
He pōturi kē te haonga i te haurua tuatahi o te tau, engari i horo haere ngā hokonga Pāua Tūwā ora ki te paunga o te tau, me te aha e 357mt i haoa, ko te 94% o te Mahere.
Nā te iti o te hiahoko o ngā kai pōwhā i auau ake ai ngā kōrerorero, i whakatauria hoki he whāinga hou kia nui ai ngā hua i ngā tukunga kai ora ki tāwāhi me ngā tukunga mīti pātio ki te mākete tarāwhare. Nā konei i arotahi ai te tira ki ngā haonga o ētahi wāhi nui e pai ai te haonga o ngā hua ora kounga, me ngā mahere hoki e pā ana ki te kaha o te āheinga ki te kauhoe, me te raukaha hoki o te tira hei tautoko i te whakawhitianga e hiahiatia ana ki te momo hua hou.
I te haurua tuatahi o te tau, i uaua tā mātou hao ika nā runga i ngā ritenga ōhanga auheke ki ngā mākete matua ki Āhia o te pāua pōwhā, me te pikinga hoki o te nui, me te kounga o ngā pāua pōwha Hainamana me ngā utu tino iti rawa. Kua whakawhāiti ētahi kaihoko huhua ki Hong Kong i ā rātou mahi, me te kati hoki i te 30-50% o ngā toa. Ki Mareiha, i kaha te rīwhi o tā mātou ratonga ai ki ngā hua Hainamana me ngā utu iti kē.
Ka ngana ki te whakaū i ngā haonga i te haurua tuarua o te tau, ka heke te utu mā te 20% i Hingapoa. I pūrongotia e ngā kaihoko i Hong Kong he toenga hua mai i te Tau Hou Hainamana, ā, e horokukū tonu ana ki te hoko, ki te āpiti hoki ki aua rāngai mai anō i te Maehe.
Te taha ki nga hua Ora, i oti i te tira hao tētahi haonga ika Ora nui kia eke ai te Mahere ahakoa ngā āputa ruarua nā runga i te huarere. Ahakoa te hiahoko iti ki te kai pōwhā i te Tau Hou Hainamana, i hiahiatia tonutia te hua Ora i Haina i taua wāhanga o te tau me ngā utu nui hoki. Heoi i pāngia kinotia ngā utu i te paunga o te tau e ngā pāua ngutu-kākāriki ora o Ahitereiria me ngā utu iti iho i ā Aotearoa, me te aha ka whakaaro hoki ngā kaihoko piripono ki te tahuri atu. Ahakoa tā mātou ngana ki te pupuri i te nui o ngā hokonga, ko te utu o tērā ko ngā utu pai i whakaūngia i mua.
I raru kino nga utu i te mutunga o te tau e nga ngutu kaakaariki o Ahitereiria me nga utu iti i Aotearoa, a kei te whakaaro ano nga kaihoko pono ki te tahuri ke atu.
Ko te huanga o ngā hokonga iti i te haurua tuatahi me ngā utu iti i te haurua tuarua ko te huanga tau whakatukaru, e $2.6 miriona iti iho i te UMMT i Maheretia, ko te take nui ko te taitapa iti o te hua pōwhā. E rapu tonu ana i ētahi atu hōngere hua uara-pikipiki hei whakatairite i te hiahoko iti ki te hua pōwhā mēnā rānei ka pērā tonu ahakoa te pai haere o ngā āhuatanga ōhanga.
IX
of
XV
Kōura
Mahia ai ā mātou moni utunga ōura mā roto i te whakaurunga ki Port Nicholson Fisheries, he pakihi Iwi-rau e arotahi ana ki te rārangi kawe Kōura me ngā tukunga hua ora anake ki Haina.
Kei runga ake ngā moni utunga kōura TP24 i te Mahere mā te $1.2 miriona, 10% rānei. Ka whakaatu te huanga mō te tau i tō Moana wāhanga o ā PNF huanga mō te haurua tuarua o te tau kōura 23/24 me te haurua tuarua o te tau 24/25, i te taha o ngā marama 12 o te hua pūtea o te roherohenga pūmau.
He nui ake tō mātou wāhanga o tā PNF huanga i te Mahere 2024 mā te $0.8 miriona. He nui atu te huanga roherohenga hoki i te Mahere mā te $0.3 miriona nā ngā utu roherohenga nui kē i whakatauria e PNF mō te tau hou i tīmata i te Aperira 2024.
$1.2m
above Plan for Kōura earnings
$0.8m
share of net surplus - up on Plan
$0.3m
quota return - up on Plan
Ahakoa te huanga pai rawa, he uaua ngā ritenga tauhokohoko, inā hoki i te haurua tuarua o te tau, he iti, he marore te hiahoko me te aha he iti iho ngā utu i tā mātou i whakaaro ai.
Ahakoa he pai ngā putanga a te nuinga o ngā takiwā whakahaere mahinga ika (TWMI), e taumaha tonu ana ngā haonga ki CRA3 (Tairāwhiti/Māhia), kīhai i haoa tōna 50% o te HIT i wātea ki a PNF i te mutunga o te tau, i te 31 o Mahere 2024. I muri mai i te hātepe kōrerorero, ka poroa te HTKW mō CRA3 mā te 20%, ka piki ai ki te 30% i te parenga tūao a te rāngai i te 10% kia tere ake ai te hokinga o te mauri o te mahinga ika.
Kua pānuitia rawatia iho te hokinga ōkawa o te kōura o Ahitereira, ā, ahakoa kāore anō kia mārama te rā, e pūrongotia ana te hikinga o ngā rāhui i mua mai o te Tau Hou Hainamana 2025. I rāhuitia te kōura Ahitereiriana mai anō i te Oketopa 2020, ā, kāore e kore he pānga āna tā tōna hokinga ōkawa ki ngā utu a PNF.
X
of
XV
Pāua Kahurangi
Ahakoa i raro te huanga tau katoa mō te Pāua Kahurangi i te Mahere 2024 mā te 5%, i runga ake te taurite utu i te Mahere mā te 3.5%
11%
higher revenues than Plan for Pāua Kahurangi domestic sales
Nāwai i uaua ngā utu tukunga me te hiahoko i te paunga o te tau, ka uaua kē atu i te whakawhāiti a ētahi whenua tuku rawa i ā rātou utu, engari i tautokona te taurite utu mō te tau e ngā utu tuku rawa nui i te tōmuatanga o te tau, me ngā utu rererangi iti iho i te Mahere. He rite ngā hokonga, engari kāore i kaha pērā i te tau pūtea o mua.
I kaha tonu te hiahoko me ngā utu ki te kāinga i te roanga o te tau, me te aha he nui atu ngā huanga i te Mahere mā te 11%. Nā reira i tautokona ai te pikinga o te taurite utu.
Ki te pāmu, i angitu te kaupapa Project Stabilise (i tū i te tau 2021) ki te whakaū i ngā haonga, i ngā utu pāmu hoki. I roto i te tau pūtea kua hori, ka iti iho te hiko i pau hei whakamahana i te wai nā runga i te korenga o te kaha mātao, te kaha wera o te wai, me te aha ka tuputupu tonu atu te pāua i te roanga o te raumati, me te iti i tāmatemate. Nā ngā mahi whakahaere ki Ruakākā i ū tonu ai ngā utu.
Kua rewa te pāua kōnatunatu ki te mākete tarāwhare i roto i ngā tau kua hipa, ā, he āheinga tēnei i roto i ō mātou hōngere hokonga tarāwhare.
XI
of
XV
Tio
Ahakoa te nama a te Tio, he $1.3 miriona te nui, he nui atu tēnei i te Mahere mā te $2.5 miriona, ā, he pai ake i te otinga o te 2023 mā te $1.9 miriona.
Nā te pānga o ngā huarere kikino 2023 e pā tonu nei, nā te pānga hoki ki te tupuranga o ngā pūhouhou o tērā tau hei hua manahua i te tau nei, kua whakapau kaha mātou kia tae atu ai ngā haonga iti i maheretia ki ngā mākete utu nui rawa. Nā konei i iti iho ai i te Mahere ngā hua anga-tahi pātio o Ahitereiria, engari i nui atu te mākete tarāwhare o te hua mātao nā runga i ngā utu nui kē mō ngā momo hua anga-tahi mātao nui kē atu. He pai tonu te whanonga o ngā tio iti, i piki anō rā te hiahoko o te kiritaki rāngai tāroi kaipuke, mai anō i te auhekenga i muri mai i te Kōwheori.
XII
of
XV
Sealord
He tau nui te TP24 mō Sealord, i te hokonga o Independent Fisheries Limited (IFL), kei Ōtautahi e tau ana, i te 31 o Hanuere 2024.
Ko tā IFL te kete roherohenga ika-noho-kōpua nui tuawhā o Aotearoa, ā, ko te Kāhui o Sealord te kaipupuri roherohenga nui rawa o te motu i nāianei. Ko te hokonga o IFL te tauhokonga ā-pūtea nui rawa i te rāngai kaimoana mai anō i te whakaaetanga o Sealord i te tau 1992, he wāhanga o te Whakataunga Mahinga Ika Māori. Puritia ai te katoa o te roherohenga a IFL i hokonga ki roto i te Pupuri Taonga Trust tahi me te roherohenga katoa a Sealord ki Aotearoa, hei reira pūmau ai te puritanga a ngā iwi. Ka whakaūngia hoki e te hokonga o IFL he tāngata nui ko ngā iwi ki te umanga kaimoana o Aotearoa.
Huia tahitia ngā tāna e 46,000 o te roherohenga, kei roto i te hokonga o IFL ko ētahi waka hao, me tetahi e kirimanatia ana, ki te moana uriuri; e 500 ngā kaumoana, kaimahi ki uta hoki; me tētahi whare rokiroki mātou hou ki Ōtautahi. Kua waru marama e puritia ana e Sealord, ā, kua kitea iho he tino pai te noho mai a IFL ki a mātou, ā, he pai kē atu i tā te kēhi pakihi i whakaaro ai ko ngā hua o te piringa o ngā hokonga, ngā mahinga me ngā utu.
Kua kitea iho he tino pai te noho mai a IFL ki a mātou, ā, he pai kē atu i tā te kēhi pakihi i whakaaro ai ko ngā hua o te piringa o ngā hokonga, ngā mahinga me ngā utu.
I te TP24 ka oti pai te rīwhitanga mātotoru o te Mahere Rauemi Pakihi (MRP) i te tīmatanga o te tau. I te haurua tuarua o te tau, i whakakapi a Sealord i tā mātou pakihi hāpukarāwaho King Reef ki te raki o Queensland, me te whakataetae o ngā hokonga rawa whakamutunga i te 29 o Noema 2024.
Ki te taumata o te Kāhui o Sealord, ko te Huanga Haonga i Muri i ngā Tāke (HHMT) he huanga o te NZD 53.6 miriona. Kei roto i te huanga nei ko ētahi rawa wā-kotahi e rua, ehara i te uka. Ko te mea nui rawa ko te huanga “hokonga utu ngāwari” i te hokonga o tā IFL roherohenga, ā, ko te whakataunga a te wāriutanga roherohenga rāwaho i tohua i raro i te NZ IFRS 3 Business Combinations he nui atu te uara tika o te roherohenga i hokona i te utu hokonga. E āhua whakamāmā ana i tērā ko te raungaititanga a P&L o ngā rawa hāpukurāwaho King Reef me te rikoata huanga moni tāwāhi e hāngai ana. I muri i te whakaritenga o ērā mea, he $23.9 miriona te HHMT, ā, ka takea te utunga moni TP24 a Sealord e marohitia nei i te 40% o taua whika.
E koa ana te ngākau i te ekenga a ngā wāhanga mahi e toru o Sealord o ā rātou whāinga huanga i te TP24. Kei roto ko te pakihi hiika matua o Sealord e hoki ana ki te ora, me tā IFL whakatutuki i tāna nama mahere hokonga ahakoa te tau tūpuhi tuarua o te wheketere.
Kua rua ngā tau tōnui ki te pakihi Petuna i Tāhimānia i tino nui rawa ai te UMMT, i nui tonu ai hoki ngā utu mākete tarāwhare mō aua momo ika, ka tautokona hoki aua huanga e ngā haumitanga whakawhānuitanga o mua nei ki te pāmu whakatuputupu o Rowella me te paonga Cressy hoki.
E koa ana te ngākau i ngā whakatau rautaki i oti, i tutuki hoki i te TP24, me te aronga hoki ki te whakawhirikoka, ki te whakangāwari hoki o ā Sealord mahinga ika-noho-kōpua ā te TP25 hei whakatupu i te HHMT mā ngā kaipupurihea.
XIII
of
XV
Matapae
Ko te whawhai i te tāmi ahumoni me te hekenga ōhanga ā-ao ngā kaupapa matua o ngā tau e rua kua hipa. Ahakoa he taumaha tonu ēnei kaupapa, nā te kaha o te tūāpapa o Moana, ka taea e mātou te kite i ngā painga o ngā ōhanga e whanake ana.
Hui katoa ētahi atu take rāwaho, pēnei me te ngā pakanga nui e rua i te ao (ki Ukraine me te Pokapū Rāwhiti), te pitomata ka mārō haere ngā kaupapa here tauhoko a Amerika, me te whanonga ōhanga o te hoa tauhoko nui katoa a Aotearoa (Haina), ka haurokuroku ngā matapae ōhanga. Ko tā mātou whakaaro, ka mimiti te hiahoko o ō mātou hōngere hokonga mō te wā poto, ā, kāore mātou e āhei ana ki te whakapiki utu hei whakahoki mai i ētahi o ngā pikinga utu nui o te wā.
Te taha ki te Ika, ko te nui haere o te HIKW mō te nuinga o ngā takiwā tāmure he āheinga ki te whakawhānui i ngā haonga, tae atu ki te āheinga ki te whakawhānui i te haonga o ngā huinga momo ika o uta, inā hoki ki te FMA8 (Taihauāuru o te Ika-tapu-a-Māui). Heoi anō, ko te wero nui mō te tāmure ko te rapu kiritaki hou ki waho o te mākete tarāwhare, mākete o Ahitereiria hoki, e pūhake kē ana. Ka whiti ki te rua o ngā tau e whai wāhi ai mātou ki te HIT o uta a Sanford ki te Ika-tapu-a-Māui, tae atu ki te whiwhinga ki ngā haonga ika e tika ana mai i te rangi tuatahi, ka taka mai ētahi atu painga i te ekenga o ngā whakapakritanga mahi.
Ko te wero nui mō te tāmure ko te rapu kiritaki hou ki waho o te mākete tarāwhare, mākete o Ahitereiria hoki, e pūhake kē ana.
E whakaarohia ana ka hoki te mauri o te tio hei te roanga o te tau 2025, ka whakawhānui mātou i ngā hua pāmu i muri i ngā tāmatenga nui e pā ana ki ngā huarere kino i te tau 2023. E whakaaro ana mātou he kotahi miriona taihana ka hokona atu hei te tau 2025, ā, he 70% nui atu i ngā hoknga i te tau 2024.
Ka taumaha te āhuatanga mākete mō te Pāua Tūwā nā te āhua o ōhanga tarāwhare o Haina e iti ai te hiahoko (tō mātou mākete matua mō te pāua tūwā ora) me te hiahoko ki te pāua tūwā pōwhā ki Hingapoa/Mareiha/Hong Kong, kei reira te pāua pāmu Hainamana te tuputupu ana, e pēhi ana i te nui me te utu o ngā tono.
Ahakoa kua pānuitia te hokinga o te tukunga tika o te kōura Ahitereiriana, kāore anō kia mārama te wā o taua panonitanga, māna te kore ka rite mō ngā whakanuitanga o te Tau Hou Hainamana. Ahakoa e taetae kē ana te nuinga o aua hua ki Haina mā roto i te hōngere kiwikiwi, e whakaarohia ana a pāngia kinotia te hokinga ōkawa ki te utu i whakaritea e PNF. Waihoki, kua pēhia whānuitia te hiahoko i ngā marama nei nā aua take anō rā kei runga nei mō te pāua tūwā ora.
E māro tonu ana te haere o te Pāua Kahurangi i ngā tau e toru kkua hori, ahakoa he iti ngā āheinga kia whakawhānuitia (i tua atu i te whakarite utu). Kāore mātou e whakaaro ka rerekē tērā i roto i ngā marama 12 nei, me aro hoki kei te pēhia ngā utu o ngā haonga iti hoki e tukuna oratia atu nei e mātou ki Haina.
XIV
of
XV
Ata o Moana New Zealand
Iwi
100%
Iwi owned
58
shareholders
34
Long-term Iwi partnerships
7780
kg fillets of pātaka provided to Iwi
$144.3
Million dividends paid to Iwi to date
$6.58
Million dividend for the year
People snapshot
343
Employees (27% Māori)
43
Full-time contract fishing vessels (55% Māori)
35
Contract divers (77% Māori)
18
Contract oyster growers (44% Māori)
Process
Operations map
Our products
Pāua Kahurangi (Blue Abalone)
Pāua Tūwā (Wild Abalone)
Koura (Lobster)
Tio (Oyster)
Kai Ora (Ready to Eat Meals)
Ika (Fin Fish)
Market
$5.9
million in North America
$10.4
million in China
$10.3
million in rest of Asia*
$0.8
million in other**
$41.9
million in Australia
$96.2
million in New Zealand
*Singapore, Hong Kong, Taiwan
**Europe, Pacific Islands and Middle East
***Figures include Lobster ACE sold through Port Nicholson Fisheries partnership
**Europe, Pacific Islands and Middle East
***Figures include Lobster ACE sold through Port Nicholson Fisheries partnership
Up or down on previous year
Sales
XV
of
XV
E whakamahia ai te Orchestra–te tomokanga ipurangi whakawhiti kōrero mā te kaipupurihea o Moana NZ
Whakamahi ai a Moana i te tomokanga ipuranga, i Orchestra, e wātea ana ki ngā kaipupurihea kia whai wāhi ai ki ngā tauākī moni hua me ngā kōrero e pa ana ki taua moni hua. E whai wāhi ana ko ngā pūkete īmēra whai mana anake ki te kōpaki kei reira ngā tauākī moni hua mō ō rātou rōpū.
Pātai auau
next
Takenga tūturu